Jäger im Schwelmer Platt

Jäger-Stammdisch


Vam Jäger-Stammdisch sitt te berichten dä allerunwirklichsten Geschichten.

So soaten noch tau later Stunne dä klauken Jäger inne Runne, dohen ähre Jagderlebnisse vertellen, van Hasen dä fleiget, un Rehe dä bellen. Dat grötzde Jägerlein wue vertallt, un ümme ne nigge Runne bestallt. Do mellet sick plötzlich Ener te Woart:

"Wat eckjetz vertelle, hätt gätt noch nü gehoart: eck hadde vö kuotten en Hasen geschuotten, üm ne te huollen raste min Rüe fuotten, doch schidder äs hä, koam dä Adler gefluogen, hätt dän Hasen in sine Krallen genuommen, dän Rüen noahm hä dobi ok noch met un freude sick üewe dä Beute so fett! Eck dach, dat lo'k mi doch nich gefallen, noahm dä Flinte, do dän Adler affknallen - doch wat passeerde no minem Schuß ? Adler un Hase follen, met dänen wo Schluß , doch ohne ink hi nu te beleugen - da Rüe blew uowen un holl sick am fleigen!"

Von Anita Stiepermann, Schwelm


Wildfiärken


Da Jäger sittet dä halwe Nacht
op sinem Hochsitz un hölt Wacht, hä well sä unbedingt bemerken - dä Rotte van dän wilden Fiärken.

Da Beester niämmt nu Üewehand, zerstört Wieschen un ok Ackerland, drum well hä enige bejagen, ok äm platzt langsam nu dä Kragen!

Hä kickt dürch't Fähnglas, ganz gebannt, dä Flinte es alt längs gespannt, langsam wätt et äm ok kolt — do raschelt et im drögen Holt: Doch et es keine dicke wilde Sau, en Foss kömmt do ut sinem Bau, hä niggelt inne Giegend rüm, dann dräget hä sick gelangwielt üm.

Kein Keiler, keine Bache, kein Frischling es do, däm Jäger wätt all möhlick kloar: In düeser Nacht hätt et keinen Zweck, alle wilden Fiärken sitt wiet wäg.

Stief vam Sitten - et es kein Wunner - klätert hä vam Hochsitz runner, erfolglos wo dat ganze Gedöne, nu freut hä sick op sin warmet Teheeme.

Hä föhrt op sin Hus tau, kickt unglöbig ut dä Wäsche, wat süht hä do ?!?! Leck mi inne Täsche: Ne Rotte Wildfiärken, et wo alt schlimm, wäuhlden do op sinem Grundstück rüm!

Da Diers won schlau, un hätt sick gedacht: "Lo dän Jäger män wachen dä ganze Nacht, hi sitt vi wiet wäg van allen Gefahren, nu wäuhlt vi genußvoll in sinem Ga'en!"

Von Anita Stiepermann, Schwelm

Zugriffe heute: 4 - gesamt: 1515.